2 сәуір күні әл-Фараби атындағы Қазақ Ұлттық университеті Алматы қаласының әкімдігімен бірлесіп «Ғылым, бизнес және өндіріс интеграциясы» тақырыбында форум өткізді. Форумда еліміздің ең ірі мегаполисі Алматы қаласының өзекті мәселелерін ортаға салып, түрлі секторларда ғылым мен тәжірибені ұштастыру, осыған орай туындаған мәселелерді шешу бойынша ұсыныстар әзірлеп, тәжірибе алмасу мақсаты көзделді.
Форумға қала әкімі Ерболат Досаев пен бизнес құрылымдар мен өндіріс өкілдері қатысты. Алматы қаласының өзекті мәселелерін ғылыми зерттеулер мен инновациялық тәсілдер арқылы бірлесіп шешу мемлекеттік органдар, ғылыми қоғамдастықтар, сондай-ақ, жоғары оқу орындары мен кәсіпкерлер үшін ортақ іс. Бұл ретте өзара іс-қимылды үйлестіру үшін интеграцияланған платформаны дамытуға жіті көңіл бөлінді.
Әл-Фараби атындағы ҚазҰУ Басқарма Төрағасы-Ректор Жансеит Түймебаев өз сөзінде университет ғылымды дамыту, оның ішінде қолданбалы зерттеулер жүргізіп, ғылыми жаңалықтарды коммерцияландыруға, ғылым мен өндірістің байланысын күшейтуге баса мән беріліп отырғанын айрықша атап өтті.
Университетте 8 ғылыми-зерттеу институты, 140 зертхана, 34 ғылыми орталық және 2 ұжымдық пайдалану зертханасы табысты жұмыс істейді. Форумға қатысушы қонақтар әл-Фараби атындағы Қазақ ұлттық университеті жанынан 2024 жылы қыркүйек айында ашылған «FARABI HUB» инновациялық даму, жоғары технологиялық жобалар және өнімдер орталығында университетіміздің қол жеткізген жетістіктерімен таныстырылды.
Сонымен қатар, қонақтар заң факультетінің қылмыстық құқық, қылмыстық процесс және криминалистика кафедрасының негізінде құрылған Сот сараптама орталығының жұмысымен, оның нәтижесімен де танысты. Сот сараптама орталығы құқық қорғау органдарына, сот жүйесіне, адвокаттар алқасына және басқа да мемлекеттік құрылымдарға қолдау көрсете отырып, республикада сараптамалық қызметті дамытуға белсенді жәрдемдесуде.
Орталықта сот сараптамасы және криминалистикалық сараптамалар бағыты бойынша магистранттар білім алады. Әрі ҚР Әділет министрлігінің Сот сараптамалары институтымен сот-сараптамалық зерттеулердің әдістемелерін бірлесе отырып әзірлеу, сот сарапшыларының біліктілігін арттыруды ұйымдастыру бағытында жұмыс істеуде. Аталған Орталықта алыс және жақын шет елдерде, Лондон Корольдік колледжінде «Болашақ» бағдарламасы бойынша оқыған, сондай-ақ, Стамбулдағы Еуразиялық сот медицинасы және сараптама академиясында біліктілігін арттырған лицензияланған мамандар қызмет атқарады.
Ғылым мен бизнес, өндіріс, әкімдік өкілдерінің басын қосып, бір мақсатта жұмылдырған мұндай форум елімізде Әл-Фараби атындағы ҚазҰУ ректоры Ж.Қ. Түймебаевтың ұйымдастыруымен алғаш рет өткізілді. Игі шараның алдағы уақытта да жалғасын табары және осындай пікірталас алаңын құру қоғамның әртүрлі секторының ынтымақтастығына негізделген тұрақты болашақты қалыптастыруда маңызды қадам болары анық.
Нұрайша Темірболат ,
Қылмыстық құқық, қылмыстық іс жүргізу
және криминалистика кафедрасының
аға оқытушысы, з.ғ.к.
