№44 (3846) 14 июня 2024 Қазақстанда банк карталарын шығару ережелеріне өзгерістер енгізіледі. Қаулы жобасын Қаржы нарығын реттеу және дамыту агенттігі жариялады, — деп хабарлайды Massaget.kz тілшісі.
Құжатқа сәйкес 18 бен 21 жас аралығындағы қазақстандықтарға картаны онлайн шығаруға немесе қайта шығаруға тыйым салынбақ. Олар жаңа карта алу үшін енді банк бөлімшесіне баруы керек.
Сонымен қатар, банктерге 21 жасқа дейінгілермен қашықтан іскерлік қарым-қатынас орнатуға тыйым салынуы мүмкін.
Тағы бір жаңалық 14 пен 18 жас аралығындағы қазақстандықтарға қатысты. Олар интернетте банк қызметін пайдаланса, олардың мұндай операциясын ата-анасы немесе басқа заңды өкілі міндетті түрде растауға тиіс.
Жоба авторларының сөзінше, клиенттерді алаяқтықтан қорғау үшін мұндай шаралар әсте қажет.
Сондай ақ, банктер мынадай клиенттерді бақылауы керек:
- бес және одан да көп картаның иелері (бір немесе бірнеше банктен алынған);
- 14-25 жас аралығындағы ресми табысы жоқ азаматтар, оларға туыстарынан емес, басқа тұлғалардан ірі сомада ақша түссе, олар үшінші тұлғалардың атына жиі аударымдар жасаса; т.с.с.
