ҚР Ұлттық банкі төрағасының орынбасары Берік Шолпанқұлов Қазақстанда айына 255 мың теңгеден басталатын мобильді аударымдарды бақылау туралы сұраққа жауап берді, — деп хабарлайды Massaget.kz тілшісі.
Оның айтуынша, қазір бұл мәселе қызу талқыланып жатыр.
«Қазір біз Мемлекеттік кірістер комитетімен және банк қауымдастығымен белсенді жұмыс істеп жатырмыз (…) Қазір, өздеріңіз білетіндей, былтырғы талапқа сәйкес, біз әртүрлі тұлғадан 100-ден астам аударым алатын ЖСН беріп жатырмыз. Енді олар шекті мәнді көргісі келеді және бұл шек туралы көп пікірталас бар», — деді Шолпанқұлов Сенатта өткен брифингте.
Ұлттық банк төрағасының орынбасары бұл шешім банк қауымдастығы мақұлдаған жағдайда ғана қабылданатынын айтты.
«Мемлекеттік кірістер комитетінен ұсыныс айтылды, біз оны талқыладық, қазір банк қауымдастығы техникалық жағынан енгізуді қарастырып жатыр. Оны мақұлдаса — енгізіледі. Егер мақұлдамаса — басқа жолы ізделеді», — деді Шолпанқұлов.
