Қазақстанда тұрғын үй кезегінде тұрған азаматтардың саны 870 мыңға жетті. Бұл туралы құрылыс және өнеркәсіп министрі Ерсайын Нағаспаев үкіметтегі брифиңде айтты. Бұл туралы Baribar.kz хабарлап отыр.
Тұрғын үй құрылысы сұранысты толық өтей алмайды
Министрдің айтуынша, елімізде жыл сайын пайдалануға берілетін тұрғын үйлердің көлемі артып келеді. Биыл 20,4 миллион шаршы метр тұрғын үй салу жоспарланған. Алайда баспанаға мұқтаж азаматтардың саны да көбейіп отыр.
Ерсайын Нағаспаевтың сөзіне қарағанда, «Отбасы банк» тұрғын үй кезегіндегі азаматтардың деректерін тұрақты түрде тексеріп, жаңартып отырады. Соған қарамастан, қазір кезекте 870 мың адам бар.
Өкінішке қарай, біз бәрін баспанамен қамтамасыз ететіндей көлемде тұрғын үй салып жатқан жоқпыз, – деді министр.
Әлеуметтік баспананың бір шаршы метрі қанша тұрады?
Сонымен қатар ведомство басшысы тұрғын үй кезегінде тұрған азаматтар үшін «Отбасы банк» арқылы бірнеше жеңілдетілген ипотекалық бағдарлама қарастырылғанын еске салды. Ал әлеуметтік тұрғын үйдің бір шаршы метрінің орташа бағасы 335 мың теңгеден аспайды. Мұндай баспананы тұрғын үй кезегінде тұрған азаматтар сатып ала алады.
