Қазақстанда бірінші атом электр станциясының құрылысы екіншісімен қатар жүре ме? Бұл сұраққа Энергетика министрі Алмасадам Сәтқалиев жауап берді, — деп хабарлайды Massaget.kz тілшісі.
Министрдің айтуынша, Қазақстанда электр қуатының болуы мүмкін тапшылығын ескеріп, энергия қуатын жедел енгізу қажет.
«Ядролық кластер жаңа қуаттарды енгізуге де, көміртегі ізін азайтуға да мүмкіндік туғызады, осылайша, біздің «жасыл» күн тәртібіндегі міндеттемелерімізді қамтамасыз етеді. Осыған байланысты құрылысты қатар жүргізуге мүмкіндігіміз бар деп есептеймін. Бұл үшін бізде қажетті ресурс бар. Құрылыс әртүрлі алаңда жүргізіледі. Жалпы алғанда, мұндай сценарийді іске асыруға мүмкіндік бар», — деді Алмасадам Сатқалиев үкіметте өткен брифингте.
Еске салайық, мұның алдында Энергетика министрі Алмасадам Сәтқалиев «Қазақстанда екінші атом электр станциясының (АЭС) құрылысы бойынша референдум өткізіле ме?» деген сұраққа жауап берген еді.
Ал Президент Қасым-Жомарт Тоқаев бүгін, 28 қаңтарда Үкіметтің кеңейтілген отырысында АЭС құрылысын тездетуді және екіншісіне орын іздеуді тапсырған еді.
