Бүгін Астанада Ұжымдық қауіпсіздік кеңесінің отырысы өтеді. Massaget.kz тілшісі Астанада өтетін бұл шараға қай ел президенттері келгенін анықтады.
Кешелі бері мемлекеттер басшылары Астанаға келе бастады. Алғашқы болып Беларусь президенті Александр Лукашенко келді.
Ресей Федерациясының президенті Владимир Путинді елорда әуежайында Қасым-Жомарт Тоқаев қарсы алды. Ақорданың хабарлауынша, мәртебелі қонақты күтіп алу үшін әуежайда Құрмет қарауылы сап түзеді. Қазақстан мен Ресей халықтарының шынайы достығының белгісі ретінде балалар екі елдің жалауын желбіретіп, қошемет көрсетті және Владимир Путин бастаған Ресей делегациясына ілтипат білдіріп, өлең оқыды.
Сондай-ақ, Ресейдің қауіпсіздік кеңесінің хатшысы Сергей Шойгу да Астанада. ол да ҰҚШҰ отырысына қатысады.
Мәртебелі меймандар қатарында Қырғыз президенті Садыр Жапаров та бар. Садыр Жапаровты премьер-министр Олжас Бектенов қарсы алды.
Еске салайық, 28 қарашада Қазақстан Президенті Қасым-Жомарт Тоқаевтың төрағалығымен ҰҚШҰ Ұжымдық қауіпсіздік кеңесінің кезекті сессиясы өтеді. Жиында аймақтық және халықаралық қауіпсіздіктің негізгі мәселелері талқыланады.
Отырыс қорытындысы бойынша бірқатар құжатқа қол қойылады.
Анықтама: Қазір ҰҚШҰ құрамында Армения, Қазақстан, Қырғызстан, Беларусь, Ресей және Тәжікстан кіреді. 2026 жылға дейін ұйымның бас хатшысы қызметін Иманғали Тасмағамбетов атқарады.
Биыл ҰҚШҰ-ға төрағалық ету міндеті Қазақстанға өтті.
