Мәжіліс депутаты Нұргүл Тау елімізде баспана мәселесі өзекті екенін, бүгінде 1,3 млн жастың үйі жоғын айтты, — деп хабарлайды Massaget.kz тілшісі.
Ол депутаттық сауалын Өнеркәсіп және құрылыс министрі Қанат Шарлапаевқа жолдады.
«Қазақ әрқашанда өзінің қара шаңырағын хан сарайынан да артық көргені бәрімізге мәлім. Бүгінде елімізде 4,5 млн миллион адам үйге мұқтаж. Оның – 1,3 миллионы жас қазақстандық», — деді Нұргүл Тау.
Депутат саладағы өзекті мәселелерге тоқталды.
«Біріншіден, бұл еліміздегі мыңдаған салымшының тартып отырған азабы. 2023 жылы Қазақстандағы үлестік құрылыстың көлеңкелі нарығының үлесі шамамен 70% болды. Мысалы, жақында Алматы облысындағы 200 отбасы екі жылдан бері үйлеріне кіре алмай отырғаны анықталды. Екіншіден, бүгінде мойнында бірнеше несиесі бар отандастарымыз аз емес. Бұл Мәжіліс қабырғасында да көтерілді.
Осылайша, көптеген отандасымыз алғашында үй үшін несие алса, содан кейін баспанасын жөндеу үшін кредит алуға мәжбүр болған. Бұл мәселені шешу үшін тұрғын үйлердегі пәтерлерді толық жөндеу жұмыстарынан кейін пайдалануға беру ұсынылады. Мұнда әр пәтердің жөнделу бағасы салымшымен алдын ала шартта белгіленсе, мүлік бағасының шарықтауын алдын алуға болады деп есептейміз», — деді ол.
Үшіншіден, қазір елімізде 2 миллионнан астам адам баспананы жалға алады. Олардың басым бөлігі – студенттер, ал пәтерді жалдау бағасы күннен күнге шарықтап жатыр.
«Осылайша, пәтерлерді жалға беру және алу нарығын реттеудің күні келді деп санаймын. Осыған байланысты пәтерлерді жалға беру бағасының шектік арасын айқындау қажет. Сондай-ақ бұл үрдіс жүзеге асырылуы үшін жалға берушілердің бірыңғай тізілімін құру және жалға алу және беру шартының типтік жобасын бекіту қажет деп есептейміз», — деді депутат.
Төртіншіден, кейбір құрылыс компаниялары «Тұрғын үй құрылысына үлестік қатысу туралы» заңды айналып өту үшін тұрғын үйді сатып алу үшін алдын ала шарт жасасады.
«Осылайша, Қазақстанда аталған шартты жасасқан 6800-ге жуық үлескер зардап шегіп отыр. Сондықтан тұрғын үй сатып алудың алдын ала шарттарын жасасуға тыйым салу қажет. Бесіншіден, еліміздегі тұрғын үйлердің қолжетімділігін арттыру үшін тұрғын үй құрылыс жинақ жүйесін іске асыратын банк аясында trade-in бағдарламасын енгізу ұсынылады», — деді Нұргүл Тау.