Ақмолалық жас таланттар үлкен жетістіктерімен қуантып жатыр. Ел Президенті Қасым-Жомарт Тоқаев «Біздің күшіміз – жастардың білімінде», – деп, жас буынға деген сенімін жеткізіп еді. Артылған сенім уақыт өте ақталып келеді.
Ақмолалық Манап Әмір «Білім-Инновация» мектеп-интернатының түлегі. Оның оқудағы жетістігі ата-анасы мен ұстаздарын ғана емес, облыстың бүкіл білім беру қауымын қуантты. Амир халықаралық емтихандарда тамаша нәтиже көрсетіп, IELTS-те 7 балл және SAT-да 1320 балл жинаған. Оның жетістіктері назардан тыс қалмады. Түлек жеті шетелдік университет пен Назарбаев университетінен шақырту алды. Олардың қатарында Торонто университеті, Британдық Колумбия университеті, Лойола Мэримаунт және Денисон университеті сияқты беделді оқу орындары бар. Әмір сонымен қатар Гонконгтағы әйгілі университеттерден, соның ішінде Гонконг политехникалық университетінен және Гонконг қалалық университетінен де грант жеңіп алды. Мектеп-интернат-тың биология пәнінің мұғалімі Әмірхан Бекбергенов шәкірті жайлы былай дейді: «Әмір бала кезінен табиғатқа, ғылымға қызығатын. Оның білімге деген құштарлығы әрқашан оған қанат бітіретін. Ата-анасы да ұлының ғылымға сүйіспеншілігін қолдап ғылыми құралдармен қамтамасыз етті. Бұл оның ғылымға деген құмарлығын одан сайын күшейтті», – дейді ұстазы. Биология пәнінің мұғалімі Әмірхан Бекбергенов Әмірдің басқа да студенттердің жетістікке жетуіне көмектескенін баса айтты. Кіші мектеп оқушыларын олимпиадаларға дайындаудағы жетекшілігі олардың облыстық, республикалық деңгейде жоғары нәтижелерге жетуінде маңызды рөл атқарған. Интернат директоры Авджу Гурджан да мектеп түлегінің белсенділігін ерекше атады. «Әмір әу бастан-ақ өзінің мүмкіндігін көрсетті. 7-сыныптан бастап сабаққа белсене қатыса бастады, тақырыпты түсіну үшін тереңдете сұрақтар қойып, материалдарды меңгере бастады. Сонымен қатар, Әмір экологиялық клубтың өміріне белсенді қатысып, қалдықтарды жинау және қайта өңдеу бойынша іс-шараларды ұйымдастырды», – дейді Авджу Гурджан. Бұл облыстағы жалғыз мысал емес. Степногорск ауданындағы Ақсу ауылындағы №1 орта мектептің оқушысы Мадина Мұрсатова ұлттық бірыңғай тестілеуде ерекше білім мен табандылық танытып, мүмкін болатын 140 балдан 132 ұпай жинаған. «Алтын белгі» иегері Мадина негізгі пәндер бойынша жоғары нәтижелерге қол жеткізді. Ол математикадан 49 балл, физикадан 46 балл жинаған. Оның академиялық жетістігі тек ҰБТ дағы жоғары балмен шектелмейді. Мадина математика және қазақ тілі пәндері бойынша қалалық, облыстық, республикалық олимпиадалардың жеңімпазы болуы оның дайындығы мен жан-жақты білімін дәлелдейді. Бұл жетістіктер оның халықаралық деңгейде мойындалуына жол ашып отыр. Бүгінде Мадина Кипр техникалық университетінің грант иегері атанды. Бұл грант оның талантын мойындау ғана емес, сонымен қатар оқуын әлемдік деңгейде жалғастыруға мүмкіндік береді. «Мәдина әрқашан мақсатты, еңбекқор студент болған. Оның жетістігі – көп жылғы еңбек пен білімге деген сүйіспеншілігінің жемісі», – дейді математика пәнінің мұғалімі. Мадинаның жақындары да оның жетістіктерін мақтан тұтып, оның жаңа белестерді бағындыруына қолдау көрсетеді. Олар қызының жетістігінің сыры оның табиғи қабілеттері ғана емес, сонымен қатар үнемі өз бетімен жұмыс істеу, тәртіп пен үлкен мақсаттарға жетуге ұмтылу екенін атап өтеді. Жалпы, биыл Ақмолада орта мектепті 5 мыңға жуық 11-сынып оқушысы бітірген. Оның ішінде 236-сы «Алтын белгі» иегерлері, 347-сі жалпы орта білім беру ұйымдарының үздігі. Оның үстіне Көкшетау қаласында «Алтын белгі» иеленген 236 жас ақмолалық түлектерге құрмет көрсетілген. Оларға Құрмет белгісінен бөлек 100 000 теңге көлемінде ақшалай сертификаттар табыс етілді. Түлектерді облыс әкімі Марат Ахметжанов құттықтады. «Бүгінгі таңда өзін-өзі жүзеге асыру үшін және әрқайсысыңыздың алдыңызға қойған мақсатқа жетіп, өз әлеуетіңізді толық ашуыңыз үшін мемлекет тарапынан барлық жағдайлар жасалды. Өз күш-жігеріңіздің арқасында сіздер табысқа жету жолында алғашқы қадам жасадыңыздар, баға жетпес капиталға ие болдыңыздар – бұл өмір бойы тірек болатын – білім мен дағдылар», – деді М.Ахметжанов. Түлектер атынан №3 Абай атындағы дарынды балаларға арналған мамандандырылған мектеп-интернатының түлегі Әмір Дәулетбаев сөйледі: «Біз сіздердің сенімдеріңізді ақтап, Отанымыздың дамуына үлес қосуға бар күшімізді саламыз»,– деді түлек. Қорытындылай келе бұл жетістіктер біздің жас таланттарымыздың қажырлы еңбек, отбасы және ұстаздардың қолдауы арқылы биік белестерді бағындырып, Қазақстанның жарқын болашағына үлес қоса алатынын айғақтайды.
Нұрбол ЖЫЛЫС «Заң газеті»
