Алиментті өндіру — өзекті мәселе. Бала алдындағы жауаптылығын ұмытқан ата-ананың әрекеті бүгінде қоғамдық түйткілге айналды. Ажырасу деректері азаймаған соң, алимент бойынша берешегі барлардың саны да кемімей отыр.
Ал бала алдындағы қарызын өтемегендердің жауаптылығын қалай арттырамыз? Қарызын ұмытқандардың санасына қалай әсер етеміз?
Алименттен қашып жүрген азаматтарға ой салып, санасына қозғау салу мақсатында жақында ауқымды шараны қолға алдық. Ол үшін “Алимент төлеу — ардың ісі”, “Әке, алиментті ұмытпа!”, “Әке, біз сізден алимент күтіп жүрміз!” Деген мағынадағы биллборд, плакаттар әзірлеп, оны Алматы облысы Қарасай ауданының орталығы — Қаскелеңдегі көрнекі жерлерге ілдік. Адам көп жүретін базар, вокзал, Халыққа қызмет көрсету орталығы, емхана, аурухананың бірден көзге түсетін жерлеріне биллбордтар ілінді. Бұл әкелік борышын ұмытып жүрген азаматтарға ой салады деген үміттеміз.
