2025 жылы 25 мыңнан аса қазақстандықтың жалақысы өседі. Бұл туралы Су ресурстары және ирригация министрлігінің Ғылым және инновациялар департаментінің директоры Ләззат Жүсіпова мәлімдеді, — деп хабарлайды Massaget.kz тілшісі.
ОКҚ брифингінде Ләззат Жүсіпова Қазақстанда табиғи монополиялар туралы заңға түзетулер енгізілгенін еске салды. Бұл су саласы қызметкерлерінің жалақысын көтеруге бағытталған.
«Осының арқасында 1 шілдеден бастап «Қазсушар» қызметкерлерінің жалақысы өсті. Бұл өзгеріс сумен жабдықтау және су бұру саласында жұмыс істейтін 25 мыңнан аса қызметкердің жалақысын арттыруға мүмкіндік береді. Өңірлерге және статистика деректеріне байланысты жалақы орташа есеппен 35-50 пайызға дейін өседі», — деп толықтырды Жүсіпова.
Табиғи монополиялар туралы заңға түзетулер биыл 1 қыркүйекте күшіне енеді.
