2025 жылдың басынан бері 3,2 мыңнан аса этникалық қазақ қандас мәртебесін алды, — деп хабарлайды Massaget.kz тілшісі.
Еңбек және халықты әлеуметтік қорғау министрлігі мәліметінше, 1991 жылдан бері республикаға 1 млн 151 мыңнан аса этникалық қазақ оралған.
Қай елдерден оралған?
- Жыл басынан Қазақстанға келген қандастардың жартысы (48,1%) Қытайдан;
- 39,5%-ы Өзбекстаннан;
- 5,8%-ы Түрікменстаннан;
- 2,5%-ы Монғолиядан;
- 1,9%-ы Ресейден;
- 2,2%-ы басқа елдерден.
Кімдер оралып жатыр?
1 сәуірдегі жағдай бойынша еңбекке қабілетті жастағы этникалық қоныс аударушылар үлесі 60,7%, еңбекке қабілетті жастан кішілердің үлесі 31,1% және зейнеткерлердің үлесі 8,2% болған.
Еңбекке қабілетті жастағы қандастардың ішінен білім деңгейі бойынша 17,9%-ы жоғары білімді, 27,8%-ы орта кәсіби білімді, 52,9%-ы жалпы орта білімді және 1,4%-ының білімі жоқ.
Отанына оралғандар қай өңірлерді таңдайды?
Қоныс аударған этникалық қазақтар республиканың түрлі өңірлеріне қоныстанды.
Қандастарды қоныстандыру үшін еңбек күші тапшы мынадай өңірлер анықталған: Ақмола, Абай, Қостанай, Павлодар, Атырау, Батыс, Шығыс және Солтүстік Қазақстан облыстары.
2025 жылға арналған қандастарды қабылдау квотасы — 2 309 адам. 2025 жылғы 1 сәуірдегі жағдай бойынша қоныстандыру өңірлеріне 642 қандас қоныс аударған.
Мұндай өңірлерде қоныстанған қандастарға көшуге субсидия түрінде мемлекеттік қолдау шаралары ұсынылады, бір мезгілде отағасына және отбасының әрбір мүшесіне 70 АЕК (275,2 мың теңге) мөлшерінде; тұрғын үй жалдауға және коммуналдық қызметтерге ақы төлеуге бір жыл ішінде 15-тен 30 АЕК (59-ден 118 мың теңгеге дейін) мөлшерінде беріледі.
Жыл басынан бері 147 қандасқа түрлі қолдау шаралары көрсетіліп, 94 адам тұрақты жұмысқа орналастырылған.
