Балалардың күлкісі мен қуанышы – қоғамның жарқын болашағының кепілі. Сондықтан да өскелең ұрпаққа қамқорлық көрсету, олардың жан-жақты дамуына жағдай жасау және мерекелік көңіл-күй сыйлау – қайырымдылықтың ең ізгі көріністерінің бірі.
1 маусым – Халықаралық балаларды қорғау күніне орай Алматы қаласындағы И.А. Крылов атындағы қалалық балалар кітапханасында «Бақытты бала – баянды болашақ» атты мерекелік іс-шара ұйымдастырылды.
Балаларға арналған тағылымды әрі көңілді шараға кітапхана оқырмандары мен олардың ата-аналары қатысып, ерекше әсер алды.
Мерекелік жиын барысында балаларға арналған ойын-сауық бағдарламалары ұйымдастырылып, өнерпаз жастар өз өнерлерін көрсетті. Сонымен қатар жас оқырмандар қызықты кездесулерге қатысып, түрлі сыйлықтарға ие болды.
Шараның басты ерекшелігі – қайырымдылық акциясы болды. ҚР Президенті Қасым-Жомарт Тоқаевтың Алғыс хатының иегері Зәмзәгүл Асанова және психология магистрі, қоғам қайраткері, «Шайзада» демалыс үйінің негізін қалаушы Аширбекова Дана Қыздарбекқызы балаларға ерекше қуаныш сыйлады. Олар мерекеге келген 150 балаға арнайы сыйлықтар табыстап, бүлдіршіндердің жүздеріне күлкі ұялатты.
Қайырымдылық – тек материалдық көмек көрсету ғана емес, ол қоғамдағы мейірімділік пен жанашырлықтың жарқын үлгісі. Балаларға көңіл бөліп, олардың қуанышына ортақтасу арқылы демеушілер өскелең ұрпаққа қамқорлықтың маңызды екенін тағы бір мәрте көрсетті.
Мұндай игі бастамалар қоғамдағы әлеуметтік жауапкершілікті арттырып, азаматтарды қайырымдылық жасауға ынталандырады. Себебі әрбір бала бақытты балалық шаққа лайық. Ал балалардың қуанышы мен жарқын күлкісі – жасалған жақсылықтың ең үлкен сыйы.
Ұйымдастырушылар мерекенің жоғары деңгейде өтуіне қолдау көрсеткен барлық қонақтар мен демеушілерге алғыстарын білдіріп, балалар игілігіне бағытталған осындай игі шаралардың алдағы уақытта да жалғасатынын атап өтті.
