Атырау облысы бойынша Қылмыстық-атқару жүйесі департаментіне қарасты №79 мекемеде рухани-ағартушылық бағыттағы маңызды іс-шара өтті. “Жүректен жүрекке” қайырымдылық қорымен жасалған өзара ынтымақтастық туралы меморандум аясында мекеменің сотталған азаматшаларына арналған кітапханасына 3550 дана кітап табысталды.
Аталған бастама сотталған азаматшалардың білім деңгейін арттыруға, кітап оқу мәдениетін қалыптастыруға және олардың рухани дамуына қолдау көрсетуге бағытталған. Кітаптар қоры көркем әдебиет, танымдық, тарихи, тәрбиелік және мотивациялық бағыттағы шығармалармен толықты.
Шара барысында тараптар мұндай әлеуметтік жобалардың маңыздылығын атап өтіп, алдағы уақытта да бірлескен жұмыстарды жалғастыруға дайын екендерін білдірді. Кітап – адам санасын жаңғыртып, дұрыс бағытқа жетелейтін маңызды құрал екені белгілі. Осы тұрғыда аталған бастама мекемедегі тәрбиелік жұмыстардың тиімділігін арттыруға оң ықпал етеді.
№79 мекемесінің әкімшілігі “Жүректен жүрекке” қайырымдылық қорына көрсеткен қолдауы мен әлеуметтік жауапкершілігі үшін алғыс білдірді.
