Бүгін Астанада KGIR‑2025 алаңында «Логистикалық трансформация және болашақтың азық-түлік жүйесі: Қазақстанның тұрақты өсуінің жаңа драйверлері» тақырыбында екінші панельдік сессия өтті.
Бұл сессияны модератор ретінде Astana International Financial Centre басқарушысы Ренат Бектұров жүргізді. Қатысушыларға құттықтау сөзін Қазақстан Республикасы Сыртқы істер министрінің орынбасары Әлібек Қуантыров жолдады.
Спикерлер қатарында халықаралық және отандық компаниялардың өкілдері болды, соның ішінде:
- Жером Буайе (Alstom)
- Нұржан Марабаев (Semurg Invest)
- Вячеслав Мальцев (Carlsberg)
- Азамат Конратбаев (PwC Қазақстан)
- Мэтью Сейгерс (S&P Global)
- Ли Чан Ук (RETD)
- Михеил Нибладзе (Cerberus Frontier)
Қазақстан Республикасының Сыртқы істер министрінің орынбасары Әлібек Қуантыров «Қазақстанның орнықты өсуінің жаңа драйверлері: логистикалық трансформация және болашақтың азық-түлігі» тақырыбына арналған KGIR-2025 панельдік сессиясын ашты.
«Қазақстан Еуропа мен Азияның түйіскен жерінде орналасқан, жаңа көлік және энергетикалық бағыттарды қалыптастыруда стратегиялық рөл атқарады. Логистика мен азық-түлік қауіпсіздігі – өзара тығыз байланысты басымдықтар, олардың тұрақты даму үшін маңызы зор. Біздің мақсатымыз – Қазақстанның өңірлік хаб ретіндегі мәртебесін нығайту, шикізат қана емес, қосылған құны жоғары өнім экспорттау арқылы инвестициялар мен кооперация үшін жаңа мүмкіндіктер жасау», — деп атап өтті Әлібек Қуантыров.
Сессия барысында қатысушылар маңызды тақырыптар: көлік-логистика инфрақұрылымын дамыту, азық-түлік қауіпсіздігін қамтамасыз ету және Қазақстанның тұрақты экономикалық өсіміне ықпал ететін инновациялық тәсілдерді енгізу бағыттарын кеңінен талқылады.
Бұл панельдік сессия Қазақстанның өңірлік және жаһандық нарықтарда логистикалық хаб және азық-түлік жүйесінің маңызды орталығы болуға бағыт алғанын тағы бір нық дәлелдеді.
