Биыл қазақ руханияты мен әлемдік мәдениеттің ірі тұлғасы, ақын, көрнекті мемлекет және қоғам қайраткері Олжас Омарұлы Сүлейменовтің туғанына 90 жыл толды. Бұл — ұлттық әдебиетіміз бен тарихымыз үшін айтулы белес.
1961 жылы Олжас Сүлейменовтің «Адамға табын, Жер, енді!» поэмасы әлемді шарлап, қазақ есімін ғарыш деңгейінде танытты. Оның әрбір өлеңінен еркіндіктің лебі мен ұлттық намыстың оты сезілетін. Ақын поэзиясы — ескі мен жаңаның, дала мен қаланың, ұлттық құндылық пен жаһандық ойлаудың тоғысқан нүктесі. Ол қазақ жырын жаңа белеске көтеріп, интеллектуалды поэзияның негізін қалады.
Олжас Сүлейменов тек ақын емес, ол — батыл зерттеуші. Оның «Аз и Я» кітабы кезінде кеңестік идеологияның тоңын жібітіп, түркі дүниесінің тарихына мүлде басқа қырынан қарауға мәжбүр етті. Бұл еңбек қазақ халқының тарихы тереңде екенін, біздің бабаларымыздың әлемдік цивилизацияға қосқан үлесі зор екенін ғылыми тұрғыда негіздеп берді.
Олжас Омарұлының есімі «Невада-Семей» халықаралық антиядролық қозғалысымен тығыз байланысты. Ол — сөздің ғана емес, істің де адамы. Халқының қасіретіне айналған полигонның жабылуына мұрындық болып, Қазақстанның ядролық қарусыз әлемге бастаған жолын бүкіл дүниежүзіне паш етті. Бұл — нағыз азаматтық ерлік пен патриотизмнің үлгісі.
Абыз ақын соңғы жылдары ЮНЕСКО аясында мәдениеттерді жақындастыру, тілдердің туыстығы мен адамзаттың ортақ құндылықтарын насихаттаумен айналысып келеді. Оның «Мәдениеттерді жақындастыру орталығы» бүгінде жаһандық бейбітшілік пен келісімнің орталығына айналды.
Тоқсанның төріне шыққан Олжас Сүлейменов — біздің тірі аңызымыз. Оның шығармашылығы мен өмір жолы келер ұрпақ үшін таптырмас мектеп. Ақынның мерейтойын атап өту — оның еңбектерін ұлықтау арқылы ұлттық рухымызды асқақтату..
Алға аудандық сотының бас маманы
Ф.А.Хасанова
