Қызылорда облысында сотталғандар Абай шығармашылығын дәріптеді, — деп хабарлайды Polisia.kz.
Қызылорда облысы бойынша ҚАЖ департаментінің №37 мекемесінде қазақтың ұлы ойшылы, ақыны әрі ағартушысы Абай Құнанбайұлының шығармашылығына арналған мәдени-танымдық іс-шара ұйымдастырылды. Кешкі мектептің ұстаздары сотталғандарға дәріс өткізіп, ұлы тұлғаның өмір жолы мен шығармашылық мұрасын жан-жақты таныстырды.
Сабақ барысында Абайдың қара сөздері мен өлеңдеріндегі тәлім-тәрбиелік ойлар кеңінен түсіндірілді. Шараға сотталғандар белсене атсалысып, ақынның өлеңдерін жатқа оқыды. Белсенділік танытқандар мекеме әкімшілігінің алғыс хаттарымен марапатталды.
– Абайдың шығармаларын қайта оқу бізге үлкен ой салды. Қара сөздерінен өмірлік сабақ алып, өз-өзімізді тәрбиелеуіміз қажет екенін түсіндік. Мұндай шаралар бізді жақсылыққа, адалдыққа жетелейді. Алдағы уақытта қателіктерімізді түзетіп, қоғамға пайдалы азамат болуға тырысамыз, – деді сотталғандардың бірі.
