Әділдік – қылмыстық сот ісін жүргізудің негізгі қағидаттарының бірі әрі құқықтық мемлекеттің басты құндылығы. Қазақстан Республикасы Конституциясының талаптарына сәйкес әрбір адамның құқықтары мен бостандықтары заңмен қорғалады, ал сот төрелігі заңдылық, әділдік және бейтараптық қағидаттарына негізделіп жүзеге асырылады.
Қылмыстық процестегі әділдік қағидаты соттың істі жан-жақты, толық және объективті зерттеуін, дәлелдемелерге заң талаптарына сәйкес баға беруін, кінәсіз адамды жауаптылыққа тартпауын және кінәлі адамның заңда белгіленген әділ жазаға тартылуын қамтамасыз етеді.
Қазақстан Республикасы Қылмыстық-процестік кодексінің негізгі қағидаттары адамның құқықтары мен заңды мүдделерін қорғауға, соттың тәуелсіздігіне, кінәсіздік презумпциясына және тараптардың жарыспалылығына негізделген. Осы қағидалардың сақталуы ғана әділ сот төрелігін жүзеге асыруға мүмкіндік береді.
Сондықтан әділдік қағидатын сақтау – азаматтардың сотқа деген сенімін нығайтатын және заң үстемдігін қамтамасыз ететін басты шарттардың бірі.
Ербол Дүйсенбаев,
Тараз қаласы
№2 сотының төрағасы
