«Қазақстан темір жолы» ұлттық компаниясының (ҚТЖ) жаңа басқарма төрағасы болып Талғат Алдыбергенов тағайындалды, — деп хабарлайды Massaget.kz тілшісі.
Талғат Алдыбергенов бұл қызметке дейін «Қазақстан темір жолы» басқарма төрағасының орынбасары қызметін атқарды.
ҚТЖ басқармасының жаңа төрағасын ұлттық компания ұжымына «Самұрық-Қазына» басшысы Нұрлан Жақыпов таныстырды.
Айта кетейік, Талғат Алдыбергенов Батыс Қазақстан облысында дүниеге келген, 55 жаста. Алматы теміржол көлігі инженерлері институтын, Ресей халық шаруашылығы және мемлекеттік қызмет академиясын бітірген.
Еске салайық, бұған дейін Даниал Ахметовтың күйеу баласы уақытша ҚТЖ-ны басқаратыны хабарланды. Ал ҚТЖ-ны бұрын басқарған Нұрлан Сауранбаев жуырда көлік министрі қызметіне тағайындалды.