Қоғамдық тәртіп – қоғамдағы адамдардың тыныш әрі қауіпсіз өмір сүруін қамтамасыз ететін маңызды әлеуметтік құндылықтардың бірі. Әрбір азамат қоғамдық орындарда өзін мәдениетті ұстап, заң талаптарын сақтауы тиіс. Қоғамдық тәртіптің сақталуы қоғамдағы тұрақтылық пен қауіпсіздіктің негізгі кепілі болып табылады. Осыған байланысты қоғамдық тәртіпті бұзатын әрекеттер заңмен жауапкершілікке тартылады.
Қоғамдық тәртіпке қарсы әкімшілік құқық бұзушылықтар – азаматтардың тыныштығына, қоғамдық қауіпсіздікке және қоғамдағы қалыпты өмір салтына нұқсан келтіретін заңға қайшы әрекеттер. Мұндай құқық бұзушылықтарға ұсақ бұзақылық, қоғамдық орындарда алкогольдік ішімдіктер ішу, белгіленбеген жерлерде темекі шегу, қоғамдық орындарды ластау, түнгі уақытта тыныштықты бұзу сияқты әрекеттер жатады. Бұл әрекеттер қоғам мүшелерінің тыныштығын бұзып, қоғамдық мәдениет деңгейіне кері әсерін тигізеді.
Қазақстан Республикасының әкімшілік заңнамасында қоғамдық тәртіпке қарсы құқық бұзушылықтар үшін белгілі бір жауапкершілік қарастырылған. Әдетте мұндай құқық бұзушылықтар үшін ескерту жасау, айыппұл салу немесе әкімшілік қамауға алу сияқты жазалар қолданылады. Бұл шаралардың негізгі мақсаты – құқық бұзушылықтың алдын алу және азаматтарды заң талаптарын сақтауға тәрбиелеу.
Қоғамдық тәртіпті сақтау тек құқық қорғау органдарының ғана емес, әрбір азаматтың міндеті. Әр адам өз әрекетіне жауапкершілікпен қарап, қоғамдық ортада әдептілік пен мәдениеттілікті сақтауы қажет. Қоғамдық тәртіптің сақталуы адамдардың бір-біріне деген құрметін арттырып, қоғамдағы тұрақтылықты нығайтады.
Қорытындылай келе, қоғамдық тәртіпке қарсы әкімшілік құқық бұзушылықтардың алдын алу – қоғамның қауіпсіздігі мен тыныштығын қамтамасыз етудің маңызды шарты. Сондықтан әрбір азамат заң талаптарын сақтап, қоғамдық тәртіпті құрметтеуі тиіс.
Тараз қаласының әкімшілік құқық бұзушылықтар жөніндегі мамандандырылған сотының бас маман сот отырысының хатшысы Ш.С. Исмаилова
