Қазалы ауданындағы Руханият орталығында пробация қызметі, Жастар ресурстық орталығы, аудандық жұмыспен қамту және білім бөлімдерімен бірлесе отырып, пробация есебінде тұрған 12 сотталған азаматқа арналған психологиялық тренинг ұйымдастырылды.
Іс-шараның басты мақсаты — пробация есебіндегі жастардың әлеуметтік бейімделуіне көмектесу, оларға психологиялық көмек көрсете отырып, өмірлік қиын жағдайлардан шығу жолдарын көрсету.
Тренинг барысында кәсіби психолог мамандар қатысушылармен түрлі психологиялық жаттығулар өткізіп, оларды қызықтырған сауалдарға жауап берді. Сонымен қатар, өмірлік мотивация, өз-өзіне сенімділік және эмоциялық тұрақтылық тақырыптарында кеңестер берілді.
Мұндай шаралар қоғамнан оқшауланбаған сотталған азаматтардың оңалуына және қайта әлеуметтенуіне қолдау көрсетуді көздейді.
