Қазақстанда вице-президент лауазымы пайда болады. Бұл туралы Ұлттық құрылтай отырысында Қасым-Жомарт Тоқаев мәлімдеді. Қазақстан тарихында бұған дейін де вице-президент қызметі болған, — деп хабарлайды Massaget.kz тілшісі.
Тұңғыш вице-президент кім?
Бұл лауазымды 1991-1996 жылдар аралығында Ерік Асанбаев атқарған. Ол — мемлекет қайраткері, дипломат, экономика ғылымдарының докторы, Қазақстанның тұңғыш вице-президенті.
Кейін бұл қызмет таратылып, Ерік Асанбаев Қазақстанның Германиядағы елшісі болып тағайындалды.
Ерік Асанбаев 2004 жылы 23 тамызда өмірден өтті. 2023 жылы Президент Қасым-Жомарт Тоқаев Ерік Асанбаев пен басқа да көрнекті тұлғалардың есімі еліміздің тарихында ерекше орын алуға тиіс екенін айтқан еді.
Ұлттық құрылтайдағы ұсыныс
20 қаңтарда Қызылордада Мемлекет басшысы Қасым-Жомарт Тоқаевтың төрағалығымен Ұлттық құрылтайдың V отырысы өтті. Ұлттық құрылтайда Президент маңызды мәлімдемелер жасады.
«Сөз Қазақстан Республикасының вице-президенті институтын құру және оны Конституцияда тиісті түрде бекіту туралы болып отыр. Вице-президентті Парламенттің келісімімен қарапайым көпшілік дауыспен Президент тағайындайды. Оның өкілеттігін Мемлекет басшысының өзі айқындайды», — деді Тоқаев.
Вице-президент Президенттің тапсырмасы бойынша:
- халықаралық форумдарда және шет мемлекеттердің делегацияларымен келіссөздерде Қазақстан Республикасының мүддесін көрсетеді;
- Парламентте Президенттің мүддесін танытады;
- отандық және шетелдік қоғамдық-саяси, ғылыми және мәдени-ағарту ұйымдарымен өзара іс-қимыл жасайды.
- Президенттің өзге де тапсырмаларын орындайды.
