Алматыда Қазақстан Педагогикалық Ғылымдар Академиясының XXXII сессиясында академия мүшелерін сайлау өтті. Сайлау шарты бойынша үміткерлер ғылыми ізденісі негізінде білім беруге қатысты мемлекеттік тұрғыда маңызы бар нақты ұсыныс айтуы қажет. Сессияда педагог-ғалым, журналист Қанат Әуесбай «Жасанды интеллект дәуіріндегі медиа педагогика: білім беру мазмұнын трансформациялау мәселелері» тақырыбында баяндама жасады. Өз сөзінде Қ.Әуесбай ЖИ дамуы жағдайында медиа педагогика алдында тұрған жаңа мақсат-міндет турасында айтып берді. Баяндама тезистері нейрожелілерді жоғары білім беру жүйесіне қауіп ретінде емес, медиа педагогика мазмұнын модернизациялаудың түрткісі ретінде қарастырып, оқу әдістемесін соған сай жаңартуды ұсынған.
Академияның жалпы жиналысы шешімімен көпшілік дауысқа салу арқылы Қанат Әуесбай академияның толық мүшесі (академигі) болып сайланды. Академик куәлігі мен дипломын Қанат Әуесбайға академия президенті, педагогика ғылымдарының докторы Асқарбек Құсайынов арнайы табыстады. Қазақстан Педагогикалық Ғылымдар Академиясының толық мүшесі (академигі) атағы еліміздің білім беру жүйесі мен педагогика ғылымының дамуына елеулі үлес қосқан көрнекті ғалымдар мен тәжірибелі мамандарға берілетін жоғары ғылыми мәртебе.
Қ. Әуесбай – филология ғылымдарының кандидаты, «Болашақ» бағдарламасымен ғылыми-педагогикалық тағылымдамадан өткен (Ұлыбритания, Норвич қ-сы). Ол ҚР Ғылым және жоғары білім министрлігінің білім және ғылым саласындағы бақылау комитеті ұсынған ғылыми басылымдарда, Scopus ғылыми базасында жарияланған көптеген мақала авторы, ҚР Ғылым және жоғары білім министрлігінің «Ғылымды дамытуға сіңірген еңбегі үшін» төсбелгісімен марапатталған.
2004 жылы құрылған Қазақстанның Педагогикалық Ғылымдар Академиясының негізгі мақсаты – отандық ғалымдардың күш-жігерін біріктіре отырып, педагогикалық ғылым жүйесін дамыту. Бүгінде бай тарихы бар Академияның академиктері қатарында Аягүл Миразова, Ақылбек Күрішбаев, Ерлан Сыдықов, Жансейіт Түймебаев, Ерлан Арын, Бауыржан Жақып, Серік Пірәлиев, Нұрлан Дулатбеков, Қайрат Закарьянов, Досбол Байқонақов және т.б. сияқты еліміздің білім мен ғылым саласының белгілі қайраткерлері бар.
