«Қайрат» футбол клубы 30 қыркүйекте өтетін «Реал Мадридке» қарсы матч билеттеріне қатысты ресми мәлімдеме жасады, — деп хабарлайды Massaget.kz тілшісі.
Мәлімдемеде әлеуметтік желілерде тараған билет сату немесе брондау туралы ақпараттың шындыққа жанаспайтыны және жанкүйерлерді жаңылыстыратыны айтылды.
«Билеттер жайлы ресми ақпарат көздері — клубтың ресми сайты мен әлеуметтік желідегі парақшалары ғана. Қазір билеттердің сатылым басталатын күні мен бағасы анықталған жоқ. Жанкүйерлерден өзге хабарландыруларға сенбеуді және ресми емес арналардан билет сатып алмауды сұраймыз», — делінген хабарламада.
Айта кетейік, жақында өткен ЧЛ-дың негізгі кезеңіне шығу үшін «Селтикке» қарсы матч билеттері ойынға бір апта қалғанда сатылымға шықты. Барлық билет бір жарым сағат ішінде сатылып кеткен. Клубтың хабарлауынша, сайтқа 100 мыңнан аса билетке өтінім түскен. «Мадридке» қарсы ойын билеттеріне сұраныс одан да жоғары болуы мүмкін.
Сонымен қатар, «Қайраттың» кейінгі ойынынан кейін Қазақстанның УЕФА рейтингіндегі орны көтерілді. Ал алматылық клуб жанкүйерлері ЧЛ-дағы қарсыластарының, соның ішінде «Реал Мадридтің» әлеуметтік желілерін пікірге толтырды.
Фото: sportilinet.kz
