Қызылорда облысы туу көрсеткішімен республика бойынша 5-ші орында. Жыл басынан бері облыста 4 777 нәресте дүниеге келген. Бұл туралы Өңірлік коммуникациялар қызметінде өткен брифингте облыстық денсаулық сақтау басқармасының басшысы Олжас Искаков айтты.
Сыр медицинасының дамуы нәтижесінде жалпы өлім-жітім көрсеткіші 1000 тұрғынға шаққанда 1,2-ні құрап, өткен жылмен салыстырғанда 7,6%-ға төмендеген.
Туберкулезден болатын өлім-жітім көрсеткіші 3 айда өткен жылмен салыстырғанда 66,6%-ға, ал қатерлі ісіктерден болатын өлім жітім 6,4%-ға төмендеген.
– Қуантарлығы, ағымдағы жылдың 3 айында ана өлімі жағдайы тіркелмеді. Сәби өлімі былтырғы жылмен салыстырғанда 47% төмендеген. Ана мен бала өлім көрсеткіші – өңіріміздегі денсаулық сақтау жүйесінің даму деңгейінің басты көрсеткіштерінің бірі. Сол себепті өлім-жітім көрсеткіштерінің төмендеуі – саланың өркендеуі, мамандарымыздың нәтижелі жұмысы деп білеміз. Бұл бағыттағы жұмыстар асқан жауапкершілікпен атқарылуда, – деді облыстық денсаулық сақтау басқармасының басшысы Олжас Искаков.
Гүлбану МАҚАЖАН
Қызылорда облысы
