ҚР ІІМ ҚАЖ комитетінің №27 мекемесіне Орал қаласының Ақ мешітінің наиб имамы Талғат Искалиев, «Аманат-Жайық» қоғамдық қорының теологтары келіп дін ұстанушы сотталғандармен кездесті.
Аталмыш шараның өтуіне, осы мекемеде жазасын өтеген «в» есімді тұлғаның жаза өтеу барысында мекемеде терроризмді насихаттағаны үшін ҚР ҚК 256 бабының 1 бөлігімен 4 жыл 5 ай мерзімге бас бостандығынан айыру жазасына сотталғаны себеп болды.
Іс-шарада наиб имам дін ұстанушы сотталғандарға, «Білімсіз пәтуә берудің зардабы » жайында дәріс оқыды.
Түзеу мекемесі әкімшілігі алдағы уақытта осындай іс-шаралар өңірдегі Дін Істері басқармасы және теологиялық оңалту қызметін жүргізетін қоғамдық бірлестіктердің теологтарымен, психолог мамандарымен тұрақты түрде өткізілетінін айтып өтті.
«Мұндай кездесулерді түзеу мекемесінде ұйымдастырудағы мақсат-терроризм және діни экстремизм идеологиясын, деструктивті діни ағымдарды ұстанатын сотталғандарды радикалды көзқарастардан арылту болып табылады. Жалпы республикалық деңгейдегі теологтар мен имамдардың тузеу мекемелеріндегі сотталғандармен кездесуі өз кезегінде жазасын өтеушілердің діни сауаттылығын арттырып, діни көзқарастарының оң бағытта болуына көп септігін тигізеді», — дейді №27 түзеу мекемесінің теологиялық оңалту жұмысын ұйымдастыру тобының инспекторы әділет аға лейтенанты Мұрадым Сүйіншқалиев.
Кездесу соңында түзеу мекемесінде жазасын өтеушілер Орал Ақ мешітінің наиб имамы Талғат Искалиевке сұрақтарын қойып, толыққанды жауаптарын алды.
