Атырау облысы бойынша Қылмыстық-атқару жүйесі департаменті және оған қарасты түзеу мекемелерінің қызметкерлері Х. Досмухамедов атындағы Атырау мемлекеттік университетінің Экономика және құқық факультетінің студенттерімен кездесу өткізіп, қызметке орналасу бойынша үгіт-насихат жұмыстарын жүргізді.
Кездесу барысында ҚАЖ саласының негізгі бағыттары, қызметкерлердің міндеттері мен құқықтары, сондай-ақ ведомстволық оқу орындарына түсу және жұмысқа орналасу тәртібі түсіндірілді. Студенттерге ішкі істер органдарында қызмет етудің артықшылықтары, оның ішінде тұрақты жалақы, әлеуметтік кепілдіктер, тұрғын үймен қамту және зейнетақымен қамтамасыз ету жайлы ақпарат берілді.
Болашақ заңгерлер мен экономистерге ҚР ІІМ жүйесіндегі бос лауазымдар мен конкурстық іріктеуден өту шарттары таныстырылып, қызметке орналасуға ниетті жастарға қажетті құжаттар тізімі ұсынылды.
Кездесу соңында студенттер өздерін қызықтырған сұрақтарын қойып, мамандар тарапынан толыққанды жауаптар алды. Мұндай шаралар жастарды құқық қорғау саласына баулуға және отансүйгіштік рухта тәрбиелеуге бағытталған.
