Жүргізуші куәлігі жоқ адамға көлік рәсімдеуге бола ма? Толығырақ — Tengri Auto материалында.
Жүргізуші куәлігі болмаса, көлікті қалай сатып алуға болады?
Заңгер Жаслан Айтмағанбетовтың айтуынша, көлікті тіркеуде еш қиындық болмайды.
«Адам жүргізуші куәлігі болмаса да, көлікке иелік етуге толық құқығы бар. Бұл заңды және көптеген адам өз бетінше көлік жүргізе алмай немесе қаламай, көлігін басқару үшін жүргізуші жалдайды. Заңнама жүргізуші куәлігінің болмауына байланысты көлікті иелену мүмкіндігін шектемейді», — дейді заңгер.
Жүргізуші куәлігінсіз сақтандыру рәсімдеуге болады ма?
Сақтандыру бойынша, жағдай біршама ерекшеленеді. Айтмағанбетовтің айтуынша, сақтандыруды рәсімдеу үшін жеке куәлік пен жүргізуші куәлігі қажет. Себебі сақтандыру компаниялары жүргізуші сыныбын оның жүргізу тәжірибесі мен жол апаты тарихына қарай анықтайды. Жүргізушіде жол апаты неғұрлым көп болса, сынып соғұрлым жоғары болады және сәйкесінше сақтандыру сомасы да. Жүргізуші куәлігінсіз сақтандыру компаниясы мұндай бағалауды жүргізе алмайды және сақтандыруды рәсімдеуден бас тартуы мүмкін.
