Қазақстанда жастар арасындағы жұмыссыздықтың ең жоғары деңгейі Алматы мен Нұр-Сұлтанда, сондай-ақ Қарағанды облысында байқалады. Сонымен қатар, қыздар арасындағы жұмыссыздық деңгейі ұлдарға қарағанда айтарлықтай жоғары, — деп хабарлайды Tengrinews.kz тілшісі finprom.kz сайтына сілтеме жасап.
15 пен 28 жас аралығындағы жастар арасындағы жұмыссыздық деңгейі 2021 жылдың үшінші тоқсанында бір жыл бұрынғы 3,9 пайызға қарағанда 3,7 пайыз болды. Қалалық жерлерде жұмыссыздық әлдеқайда жоғары — 4,1 пайыз. Жалпы, елдегі жұмыссыздық деңгейі 4,9 пайыз болды.
Гендер тұрғысында ерлер арасындағы жұмыссыздық деңгейі әйелдерге қарағанда айтарлықтай төмен болып шықты – 4,4 пайызға қарсы 3,1 пайыз. Қалада әйелдер арасындағы жұмыссыздық деңгейі 4,5 пайызға, ауылдық жерлерде 4,1 пайызға жетті.
Қазақстан аймақтарында жастар арасындағы жұмыссыздықтың ең жоғары деңгейі Алматыда (5,4 пайыз), одан кейін Нұр-Сұлтанда (4,6 пайыз) және Қарағанды облысында (4,3 пайыз) байқалған. Жастар арасындағы жұмыссыздықтың ең төменгі деңгейі Атырау, Ақтөбе және Павлодар облыстарында байқалады.
Айта кетейік, қаңтар оқиғасынан кейін үкімет елдегі әлеуметтік-экономикалық жағдайды тұрақтандыру бойынша жедел іс-шаралар жоспарын қабылдады, онда, әсіресе, жастар арасындағы жұмыссыздықты азайту сияқты мақсат көрсетілген болатын. «Жастар тәжірибесі» және «Бірінші жұмыс орны» жобалары аясында жалақы мөлшері ұлғайтылады.
