1 Маусым — Балаларды қорғау күніне орай Абай облысында ерекше мағынаға ие, жүрекке жылы тиетін іс-шара өтті. Қылмыстық-атқару жүйесі департаментіне қарасты минималды қауіпсіздік деңгейіндегі №21 мекемеде жазасын өтеуші әйелдер Семей қаласындағы Абай перинаталдық орталығындағы шала туған сәбилер үшін жөргек, кішкентай көкірекше мен бас киімдер (шұлық, жилет, чепчик) тоқыды.
Бұл бастама — сотталған әйелдердің қоғамға қайта бейімделуіне бағытталған бағдарламаның бір бөлігі. Әйелдер әрбір жіпке мейірім мен жан жылуын, кішкентай сәбилерге көмектесем деген шынайы ниетін салды.
Дайын бұйымдарды тапсыру сәті ерекше жылы атмосферада өтті. Перинаталдық орталық өкілдері сотталған әйелдерге және мекеме әкімшілігіне алғыстарын білдіріп, бұл бастаманың маңызды екенін атап өтті. Өз өмірінде қателікке ұрынса да, жүрегінде мейірімі мен жақсылық жасауға ұмтылысы бар жандардың еңбегі жоғары бағаланды.
«Шала туған сәбилерге тек медицина көмегі ғана емес, жылулық пен қамқорлық та қажет. Осындай сыйлықтар — бұл жай ғана киім емес, бұл — мейірім мен жанашырлықтың белгісі. Жасаған игі істеріңіз үшін алғысымыз шексіз», — деді Абай перинаталдық орталығының қызметкері.
Бұл шара жазасын өтеушілер де қоғамға пайдалы іс жасап, ішкі жан дүниесінде оң өзгерістерге бет бұра алатынын көрсетті. Балаларды қорғау күні — тек балаларды қорғау жайлы еске салып қана қоймай, жақсылық жасауға әр адамның үлес қоса алатынын да дәлелдейтін күн.
