Денсаулық сақтау министрлігі зейнетақы жинақтарын жұмсауға болатын медициналық қызметтердің түрлерін анықтады, — деп хабарлайды Tengrinews.kz тілшісі.
Ведомство мамандары қазақстандықтарға өз зейнетақы жинағындағы артық соманы жаңа мақсаттарға пайдалануға құқық беретін құжат дайындады. Олардың ішінде жинақтарды зейнетақы төлемдерін біреудің атына берместен баланың емделуіне жұмсау мүмкіндігі бар. Сондай-ақ зейнетақыны шетелде емдеуге пайдалану қарастырылған.
«Бұдан басқа, емдеу бойынша бұрын келтірілген шығындарды өтеу тетігін енгізу нормасы қарастырылған. Сондай-ақ жинақтарды жұмсауға болатын медициналық қызметтердің тізбесі кеңейтілді: бұл Қазақстан аумағындағы медициналық ұйымдардағы стоматологиялық қызметтер, ортопедияның барлық түрлері және имплантацияның барлық кезеңдері, сондай-ақ ортодонтияның барлық түрлері, оның ішінде алып-салынбайтын конструкциялар.
Бұдан басқа, міндетті әлеуметтік медициналық сақтандыру көлемінен тыс экстракорпоралдық ұрықтандыруға зейнетақы артығын жұмсау мүмкіндігі бар», — деп хабарлады Денсаулық сақтау министрлігінің Медициналық көмекті ұйымдастыру департаменті өкілдері.
Қазіргі уақытта құжат Еңбек және әлеуметтік қорғау министрлігімен, сондай-ақ Қаржы нарығын реттеу және дамыту агенттігімен келісу кезеңінен өту сатысында екен. Осыдан кейін оған денсаулық сақтау министрі қол қояды және тиісті бұйрық шығады.
«Медициналық қызметтер тізбесі халықтың қажеттіліктерін ескере отырып қалыптасады. Жаңа құжатта оған тегін медициналық көмектің кепілдік берілген көлемі мен міндетті әлеуметтік медициналық сақтандыру жүйесі жабылмайтын қымбат медициналық қызметтер енгізілген. Сондай-ақ, медициналық қызметтерге зейнетақы артығын пайдалану сомасы бойынша шектеулер жоғын атап өткен жөн», — деп толықтырды ведомство өкілдері.
Еске салайық, былтыр көктемде алматылық азамат өзінің зейнетақы жинақтарын тісін емдеуге жұмсай алмайтынына шағымданған болатын. Оның айтуынша, ол ортодонтия желісі бойынша өте ұзақ емдеуді қажет етеді, ал бұл қызметтің құны айтарлықтай қымбат.
