Қазақстанда такси тасымалдаушыларына қойылатын талап күшейтілді, – деп хабарлайды Aikyn.kz сайты.
ҚР Ұлттық экономика министрлігі такси қызметін көрсетуге қатысты хабарлама беру ережесіне өзгерістер енгізді.
Енді тасымалдаушы такси қызметін бастамас бұрын жергілікті атқарушы органға міндетті түрде хабарлама жолдауға тиіс. Сонымен қатар, жаңартылған жүйеде көлік құралы ауыстырылғанда немесе автопаркке жаңа көлік қосылғанда өзгеріс енгізу мүмкіндігі қарастырылған.
Бұрынғы тәртіп бойынша тасымалдаушы нақты бір көлік құралына тіркелмейтін. Бұл жол-көлік оқиғасы болған жағдайда жолаушыларға немесе үшінші тұлғаларға келтірілген шығын үшін жауапты адамды анықтауды қиындататын.
Осыған байланысты хабарлама нысанына көлік құралының маркасы, мемлекеттік тіркеу нөмірі және шығарылған жылы туралы мәліметтер енгізілді.
Министрлік өкілдерінің айтуынша, бұл өзгерістер жолаушылар тасымалы қауіпсіздігін арттырып, заңсыз такси қызметінің үлесін азайтуға мүмкіндік береді.
