Қазақстанда қала құрылысына бақылау күшейтіледі. Атап айтқанда, рұқсат беру құжаттарын заңсыз беру үшін қылмыстық жауапкершілік енгізу жоспарланып отыр. Бұл туралы Мәжіліс жанындағы Қоғамдық палатаның отырысында өнеркәсіп және құрылыс вице-министрі Қуандық Қажкенов мәлім етті, — деп хабарлайды Massaget.kz тілшісі.
Вице-министрдің айтуынша, қала құрылысы жобаларының жүзеге асырылуын мемлекеттік қала құрылысы кадастрының автоматтандырылған ақпараттық жүйесі арқылы бақылау жоспарланып отырғанын айтты. Бұл жүйе құрылыс жобаларының бекітілген қала құрылысы құжаттарына сәйкестігін жедел қадағалауға мүмкіндік береді.
«Сондай-ақ, әкімдік қала құрылысы құжаттарына қайшы келетін жобалық-іздестіру жұмыстарына қаулы беруіне және жер телімінің мақсатты нысанын өзгертуіне тыйым салу қарастырылып отыр. Сондай-ақ, бекітілген қала құрылысы жобаларына қайшы рұқсат беру құжаттарын заңсыз бергені үшін қылмыстық жауапкершілік енгізу ұсынылады. Бұдан бөлек, нысандарды пайдалануға қабылдау кезінде Мемлекеттік сәулет-құрылыс бақылау комитеті (МСБК) мен басқа да органдардың қатысуын қарастыру жоспарланып отыр», – деді Қажкенов.
Бұған дейін өнеркәсіп және құрылыс министрі Қанат Шарлапаев Құрылыс кодексі жобасының аудит нәтижелері туралы мәлімдеген болатын.
