Үкімет отырысында оқу-ағарту министрі Ғани Бейсембаев оқу жылының аяқталуы және осыған байланысты еліміз бойынша жоспарланған іс-шаралар туралы баяндады, — деп хабарлайды Massaget.kz тілшісі.
«Биылғы оқу жылын 3,9 млн оқушы аяқтағалы отыр. Оның ішінде бастауыш сыныпты 391 мың, негізгі мектепті 364 мың бала бітіреді. Мектеп бітірушілер саны — 217 мың. «Алтын белгіге» үміткерлер саны алдыңғы жылдардағыдай 5%-дан аспайды», — деді министр.
Ғани Бейсембаевтың айтуынша, оқу жылын «Білім – Отаным» бірыңғай сынып сағаттарын өткізумен аяқтау жоспарланып отыр.
Сонымен қатар, педагогикалық кеңестің шешімі бойынша мектеп түлектеріне арналған «Мектебім, саған мың алғыс!» іс-шарасы 23 немесе 24 мамырға жоспарланған. Осылайша әр мектеп соңғы қоңырауды өткізу үшін жұма немесе сенбі күнін таңдай алады.
Аттестаттарды тапсыру салтанатты рәсімі 18-20 маусымға белгіленді. Оқу-ағарту министрлігінің мәліметінше, 9 және 11-сынып түлектерінің қорытынды емтихандары 29 мамырдан 16 маусымға дейінгі аралықта өткізіледі.