Алматылық жүргізушілер қауіпсіздік белдігін таққанды ұнатпайды. Tengri Auto пікір алу үшін қаланың Полиция департаментіне хабарласты, — деп хабарлайды Tengrinews.kz тілшісі.
Көптеген басқа қаладағы сияқты Алматыда да жүргізушілер мен жолаушылардың қауіпсіздік белдігін таққысы келмеу үрдісі сақталған.
«2022 жылы — 3 272, ал 2023 жылы 2 997 құқық бұзушылық тіркелді. Алайда 2024 жылдың алғашқы екі айында 1 540 құқық бұзушылық тіркелді, бұл жыл аяғына дейін өсу мүмкіндігін көрсетеді», — деді ПД өкілі.
Бұл статистика өзіміздің және басқалардың қауіпсіздігіне осындай көзқарастың себептері туралы ойлануға мәжбүрлейді. Оның басты себептері қатарында қауіпсіздік белдігін пайдаланбау салдарынан болатын жол-көлік оқиғалары туралы халықтың немқұрайды көзқарасы мен хабардар болмауы жатады. Көптеген жүргізушілер мен жолаушылар қауіпсіздік белдігі ұзақ сапарлар үшін ғана қажет екеніне немесе олардың көлікте қозғалысын шектейтініне сенімді. Дегенмен, статистика мәліметінше, апаттардың көпшілігі үйден алыстамай болады.
«Бәрі жүргізушілердің санасы мен заңға бағыну деңгейіне, олардың тәртібі мен мәдениетіне байланысты. Бұл өте маңызды фактор. Әрбір жол қатысушысы, әсіресе қауіптілігі жоғары көліктерді басқаратын жүргізушілер жауапкершілікте болуы керек. Олар өз жауапкершілігін екі есе сезуі керек. Қауіпсіздік белдігін тағу, жарық шамдарын қосу сияқты қарапайым қауіпсіздік ережелері балаларға үлгі болатын әдетке және автоматты әрекетке айналуы маңызды. Көліктегі бала ата-анасының мінез-құлқын қайталайды. Әкесі қауіпсіздік белбеуін тақпаса, бала мұны қалыпты жағдай деп санайды», — дейді Алматы Полиция департаментінің өкілі Салтанат Әзірбек.
