Мемлекеттік ипотекалық бағдарламалар арқылы сатып алынған тұрғын үйді жалға беру заңды ма? Бұл сұрақ көптеген тұрғын үй иелерін қызықтырады, деп хабарлайды BAQ.KZ тілшісі.
Редакциямыздың осы мәселеге қатысты жолдаған ресми сауалына Отбасы банк баспасөз қызметінің директоры Зауре Масгутова жауап берді.
Оның сөзінше, еліміздің қолданыстағы заңнамасына сәйкес, 1997 жылғы 16 сәуірдегі “Тұрғын үй қатынастары туралы” заңға сай, егер пәтер үлестік меншікте болса, меншік иесі оны басқа меншік иелерінің келісімімен жалға бере алады.
Яғни, пәтер бірнеше адамның ортақ меншігінде болған жағдайда, оны жалға беру үшін барлық меншік иелерінің келісімі қажет. Ал мемлекеттік бағдарламалар арқылы сатып алынған үйлерге келер болсақ, 2023 жылғы ҚР ЖПҚ №151 бұйрығына сәйкес, мұндай тұрғын үйлерді жалға беруге ешқандай шектеу жоқ, — деп жауап берді Отбасы банк өкілі Зауре Масгутова.
Яғни, мемлекеттік бағдарлама арқылы алынған үйді жалға беруге заң бойынша рұқсат етілген.
Демек, егер пәтер жеке меншікте болса және үлестік меншікке қатысы жоқ болса, оны жалға беруге ешқандай кедергі жоқ. Ал үлестік меншік жағдайында, басқа меншік иелерінің келісімі қажет.