Ақмола облысының полицейлері азаматтарға автокөлікті тиісті емес жерде жуу айыппұл төлеуге әкелуі мүмкін екенін ескертті, — деп хабарлайды Polisia.kz.
Көлігіңізді өзенге, су қоймасына, су айдынына, құдыққа және көшеде жууға болмайды. Табиғатты қорғау полициясы тобының ерекше тапсырмалар жөніндегі аға инспекторы Валентина Серкинаның айтуынша, өз көліктерін тиісті емес жерлерде жуған бұзушыларға жалпы қолданыстағы орындарды ластағаны үшін хаттамалар жазылады.
Көппәтерлі үйлердің аулаларында және су айдындарының жанында автокөліктерді жууға тыйым салынғандықтан, ол үшін 5 АЕК (18 460 теңге) дейін айыппұл салынуы мүмкін. Қаладағы автокөлік жуу орындарында автокөлікті жуу құны 2 000 теңгеден 5 000 теңгеге дейін екенін ескерсек, бұл үлкен сома.
«Егер сіз біреудің көлікті тиісті емес жерде жуып жатқанын көрсеңіз, бұл туралы дереу «102» желісіне хабарлауыңыз керек, өйткені аулаларда автомобильдер мен басқа да жеке мүліктерді жууға тыйым салынады. Жыл басынан бері өңірде жалпы қолданыстағы орындардың ластануына байланысты 5 000-нан астам бұзушылық тіркелді», — деп хабарлады полиция қызметкерлері.
