Вице-премьер – Ұлттық экономика министрі Серік Жұманғарин жеке кәсіпкер (ЖК) ретінде тіркелу кезінде қандай азаматтар қиындықтарға тап болуы мүмкін екенін айтты, — деп хабарлайды Massaget.kz тілшісі.
Министрдің айтуынша, салықтық қарызы бар немесе салық заңнамасын бұзғаны үшін әкімшілік жауапкершілікке тартылған азаматтарға ЖК ашу қиын болуы мүмкін.
«Егер салықтық берешегіңіз болса, немесе салық бұзушылықтары үшін әкімшілік жауапқа тартылған болсаңыз, онда жеке кәсіпкерлікті тіркеу сіз үшін біршама күрделі процесс болады», – деді Жұманғарин Мәжіліс кулуарында журналистердің сұрағына жауап бере отырып.
Сонымен қатар, ол бұрын тіркелген немесе әрекетсіз тұрған ЖК-сы бар азаматтарға да қосымша әрекеттер қажет болатынын атап өтті.
«Егер бұрын тіркелген немесе әрекетсіз (жұмыс істемей тұрған) ЖК болса, оны не жабу керек, не қайта іске қосу керек. Біз бұл процесті салық органдарының назарына іліккен тұлғалар үшін тым оңай етуге болмайды деп есептейміз», – деп түсіндірді вице-премьер.
Аталған ережелер жаңа Салық кодексінің жобасына енгізілген. Бұл кодекстің алғашқы оқылымы 9 сәуір күні Мәжілісте қабылданды.
