Экология және табиғи ресурстар министрі Ерлан Нысанбаев киіктер ауыл шаруашылығына 10 миллиард теңге залал келтіргенін айтты, — деп хабарлайды Massaget.kz тілшісі.
Оның сөзіне сенсек, киіктердің санын реттеу мәселесі Үкіметтің қаулысымен шешілген. Бұған олардың саны өскені және ауыл шаруашылығына зиян келтіргені негіз болған.
«2023 жылы 42 мың бас киік есептен шығарылды. Бүгінде бұл жұмыс мемлекет басшысының тапсырмасына сәйкес тоқтатылды. Қателеспесем, киіктер шамамен 10 млрд теңге (ауыл шаруашылығына) залал келтірді. Киіктің санын реттеуге және оларды атуға ғылыми негіздеме алдық. Онда оның саны нақты көрсетілді», — деді Ерлан Нысанбаев Мәжілістің жалпы отырысынан соң.
Министр киіктерді ату олардың популяциясына зиянын тигізбегенін атап өтті.
«Елімізде бұрын 21 мың бас киік болса, бүгінде олардың саны 4,1 миллион басқа жетті. Мысалы, БҚО-да 2,8 миллион бас киік мекендейді. Мемлекет киіктердің санын сақтау үшін бұрын-соңды болмаған шаралар қабылдады. Енді біз ауыл шаруашылығы мақсатында пайдаланылатын жерлерді сақтауға көңіл бөлеміз. Әсіресе бұл Батыс Қазақстан облысына қатысты. Әлемнің бірде-бір мемлекетінде осынша киік мекендемейді. Бүгінде киік популяциясының 99%-ы Қазақстанда», — деді ведомство басшысы.
Ерлан Нысанбаев атылған киіктер ет комбинаттарына тапсырылғанын айтты.
«4 өңірдегі ет комбинаттарымен келісімшарт жасалды. Олар (өнімді) бөлшек саудада сатты», — деді министр.
