Ішкі істер министрінің орынбасары Игорь Лепеха елде мопедті тіркеу туралы жаңа мәліметтерді айтты, — деп хабарлайды Massaget.kz тілшісі.
Ішкі істер министрінің орынбасарының сөзінше, бүгінде елде ресми түрде 18 200 мопед тіркелген.
«Олардың жалпы саны қанша екенін ешкім нақты білмейді, әртүрлі мәлімет бар. Былтыр осы санаттағы 22 мың жүргізуші куәлігі берілді, биыл 2,5 мың берілді. Бірақ кейбіреулер мопедсіз де куәлік алуы мүмкін. Қанша мопед тіркелсе, соншасы жүреді. Қалғандары мопед тізгіндей алмайды», – деді Лепеха Мәжіліс дәлізінде.
ІІМ өкілі мопедті міндетті тіркеу мерзімі аяқталуына санаулы күндер қалғанын еске салып, олардың иелерін көлікті тезірек рәсімдеуге шақырды.
«Осы сәтті пайдалана отырып, айтарым: мерзімі аяқталуына өте аз уақыт қалды. Тіпті ХҚКО-лардан барлығы мопедін тіркеп үлгеруі үшін жұмыс уақытын ұзартуды сұрадық. Себебі кейін бұл адамдар заң бойынша жүре алмайды», – деді шенеунік.
Тіркелмеген мопедтердің иелеріне қандай шаралар қолданылады? Игорь Лепеханың айтуынша, олардың көліктері айып тұрағына қойылады.
«Мопед иесі барлық қажет құжатты рәсімдеген соң көлікті жүргізе алады», – деп түйіндеді ол.
Еске салайық, бұған дейін де ІІМ мопед иелеріне үн қатып, мопедтерді тіркеу қажет екенін ескертті.
Фото: Tengrinews.kz/ Әлихан Сәриев