2026 жылғы 1 шілдеден бастап Қазақстанда электросамокат пен кикшеринг қызметіне қатысты жаңа ережелер күшіне енеді. Жаңа талаптарға сәйкес, самокатты тек 18 жастан асқан және жүргізуші куәлігі бар азаматтар ғана пайдалана алады, деп хабарлайды Aqshamnews.kz тілшісі.
Алматы қалалық полиция департаментінің ресми өкілі Салтанат Әзірбектің айтуынша, шілдеден бастап электросамокат толыққанды көлік құралы ретінде танылады. Осыған байланысты кикшеринг компаниялары мен қолданушыларға қойылатын талаптар да күшеймек.
Жаңа заңға сәйкес, самокатты жалға беру кәмелетке толмағандарға, жүргізуші куәлігі жоқ азаматтарға және көлік жүргізу құқығынан айырылған тұлғаларға тыйым салынады.
Сонымен қатар, барлық жалдамалы электросамокаттарға мемлекеттік нөмір орнатылады. Бұл құқықбұзушылықтарды тіркеп, құрылғыны сәйкестендіруге мүмкіндік береді.
Кикшеринг компаниялары:
– самокаттардың техникалық жағдайын бақылауға;
– пайдаланушының жеке басын және жүргізуші куәлігін тексеруге;
– міндетті сақтандыру рәсімдеуге;
– тұрақ орындарын реттеуге;
– жылдамдық пен қозғалысты цифрлық бақылау жүйесі арқылы қадағалауға міндеттеледі.
Жаңа өзгерістердің ең маңызды тұстарының бірі – тротуарда жүруге қатысты. Қазіргі ережеде самокатпен тротуарда сағатына 6 шақырымнан аспайтын жылдамдықпен жүруге рұқсат етілсе, жаңа түзетулерде бұл норма алынып тасталмақ.
Егер өзгерістер қабылданса, электросамокаттар тек:
– веложолақпен;
– жол жиегімен;
– жолдың оң жақ шетімен қозғала алады.
Ал арнайы белгіленген ортақ қозғалыс аймақтарында ғана жаяу жүргіншілермен бірге жүруге рұқсат беріледі.
Сондай-ақ, самокатпен жолға қорғаныс құралдарынсыз шығу, сақтандырусыз жүру сияқты әрекеттер үшін әкімшілік жауапкершілік қарастырылған.
Полиция өкілдерінің айтуынша, бұл өзгерістердің мақсаты – электросамокаттарды толық тыйым салу емес, жолдағы қауіпсіздікті күшейту.
