Цифрлық даму, инновациялар және аэроғарыш өнеркәсібі министрлігі «GPT чатын пайдалануға тыйым салынды» деген ақпаратқа пікір білдірді, — деп хабарлайды Massaget.kz тілшісі.
Жуырда цифрлық даму вице-министрі Қаныш Төлеушин Қазақстанда мемлекеттік қызметкерлерге ChatGPT пайдалануға ұзақ уақыттан бері тыйым салынғанын мәлімдеді. Тиісті бұйрыққа осы саладағы министрлік басшысы Жаслан Мәдиев қол қойғаны айтылды. Бұл тек жұмыс процестеріне қатысты болмақ, яғни деректер тарап кетпеуі үшін. Есесіне қазақстандық мемлекеттік қызметкерлерге отандық ғалымдар әзірлеген нейрожелілерді пайдалану ұсынылды.
Министрлік пікірі
Ведомство мәліметінше, мемлекеттік органдардың кейбір деректерін қорғау бойынша жүйелі жұмыс істеліп жатыр.
«Осы жұмыс шеңберінде 2024 жылы мемлекеттік секторда жасанды интеллект (AI) қолдану бойынша басшылық құжат бекітілді. Құжат AI технологияларын пайдалану кезінде киберқауіпсіздікті арттыруды мақсат етеді. Құжат ChatGPT-ді қосқанда, шетелдік AI қызметтерін пайдалануға тыйым салмайды, бірақ ықтимал тәуекелдер туралы ескертеді, әсіресе, жеке деректермен, қызметтік немесе жабық ақпаратпен жұмыс істегенде мұқият болған жөн», — деп жазылған хабарламада.
Сонымен қатар, министрлік отандық AI шешімдерін елімізде белсенді түрде дамытып, енгізіп жатқанын мәлімдеді.
«Мемлекеттік органдар пайдаланатын және қорғалған ортада жұмыс істейтін жабық желіде (ЕТС), Ұлттық жасанды интеллект платформасында мына негізгі құралдар қолжетімді: қазақ және орыс тілдеріне аудармашы, заңнама бойынша AI көмекші, сондай-ақ, сұранысқа жауап беріп, талдамалық материалдар жасай алатын үлкен тілдік модель (LLM)», — деді министрлік өкілдері.
