Қазақстанда ағаштарды жойғаны үшін өтемақының жаңа мөлшері бекітілді. Енді кейбір ағаш түрлерін заңсыз кескеніңіз, бүлдіргеніңіз немесе жинағаныңыз үшін бір ағашқа 314 560 теңгеге дейін төлеуіңіз мүмкін. Мұндай сома Экология министрлігінің бұйрығында көрсетілген, — деп хабарлайды Massaget.kz тілшісі.
Өзгерістер 2023 жылғы № 61 бұйрыққа енгізілген. Құжат егжей-тегжейлі кестемен толықтырылған, онда өсімдіктер әлеміне келтірілген залал үшін базалық мөлшерлеме көрсетілген. Айыппұл мөлшері тек тұқымға емес, ағаштың немесе бұтаның жасына да байланысты болмақ.
Жас санаты төрт топқа бөлінеді: 10 жасқа дейін, 11-ден 20-ға дейін, 21-ден 30-ға дейін және 31 жастан жоғары. Ағаш неғұрлым үлкен болса, айыппұл мөлшері соғұрлым жоғары болады.
Жеке және заңды тұлғалардан айыппұл өндіріп алынады. Жергілікті органдар тоқсан сайын салық органдарына өндіріп алынған сома туралы есеп беруге, сондай-ақ, залалды өтету үшін сотқа талап-арыз беруге міндетті.
Жаңа мөлшерлемелер күшіне енді.
