Астана әкімдігі «Астананың тұрақ кеңістігі» ЖШС-мен келісімді бұзып жатыр, тұрақтар қала балансына берілетін болады, — деп хабарлайды Tengrinews.kz тілшісі.
Бұл процес қай кезеңде және қазіргі уақытта қала тұрғындары тұрақ ақысын қалай төлеп жүр?
Астана Көлік және жол-көлік инфрақұрылымын дамыту басқармасы мәліметінше, тұрақтарды қала балансына беру процесі әлі де жүріп жатыр.
«Қазіргі уақытта мемлекеттік-жекеменшік әріптестік туралы келісімді бұзу және «Астананың тұрақ кеңістігі» ЖШС-ін коммуналдық меншікке беру процесі жүргізіліп жатыр», – деп жауап берді басқарма ресми сауалға.
Жақында әлеуметтік желіде «тұрақтарды өткізу процесіне байланысты енді ақы төлеудің қажеті жоқ» деген сыбыс тараған болатын. Алайда басқарма бұл ақпаратты жоққа шығарды. Сонымен қатар, тұрақтар қала балансына берілгеннен кейін тариф өзгермейтінін мәлімдеді.
«Астананың тұрақ кеңістігі» ЖШС тұрақтарды коммуналдық меншікке бергенге дейін бұрынғы шарттар негізінде ақылы тұрақтардың жұмысын жалғастыра береді.
Ақылы тұрақтар коммуналдық меншікке өткеннен кейін де олардың жұмыс тәртібі мен тарифі өзгермейді», – деп қосты басқарма.
