Абай облысы бойынша Қылмыстық-атқару жүйесі департаментіне қарасты әйелдер колониясында Наурызнама онкүндігі аясында 18 наурыз – Ұлттық киім күніне орай ерекше тәрбиелік мәні бар іс-шара ұйымдастырылды. Сотталған әйелдер арасында қазақ халқының бай мәдени мұрасы мен дәстүрлерін насихаттауға бағытталған ұлттық киімдер көрсетілімі өтті.
Қазіргі таңда мекемеде төрт жасақ жұмыс істейді, онда 200-ден астам сотталған әйел жазасын өтеуде. Олардың шамамен жүзге жуығы – қазақ ұлтының өкілдері, қалғандары – басқа этностар. Соған қарамастан, қатысушылар ұлтына қарай бөлінген жоқ: әр жасақтан оннан астам адам белсенді түрде қатысты. Жалпы алғанда, 50-ден астам әйел қазақы үлгідегі ұлттық киімдерді таныстырды.
Іс-шара барысында қатысушылар ұлттық киімнің мәні туралы да айтып өтті. Қазақ мәдениетінде әйелдердің әр жасына сәйкес киім түрлері бар, ал ою-өрнектер ерекше символикалық мағынаға ие. Мысалы, жас қыздардың киімдері жарқын әрі әсем болса, тұрмысқа шыққан әйелдер кимешек пен камзол киеді, бұл олардың ұяңдығы мен парасатын білдіреді. Сәукеле – қалыңдықтың ең құрметті бас киімдерінің бірі. Киімдегі ою-өрнектер жай ғана әшекей емес, олар байлықты, берекені, ұрпақ жалғастығын және табиғатпен үйлесімділікті білдіреді.
Іс-шараға қатысушылардың бірі – Талдықорған қаласының 35 жастағы тұрғыны, есірткі заттарын заңсыз сатқаны үшін 9 жылға сотталған әйел. Ол мекемеде үш айдан астам уақыттан бері отыр және мұндай іс-шараға алғаш рет қатысып отыр.
– Ұлтым орыс болғанымен, мен Қазақстанда туып-өстім. Сондықтан жүрегім қазақ деп соғады деп айта аламын. Қазақ халқының дәстүрлерінде терең мән бар, мен оларды құрметтеуге тырысамын. Осындай мәдени әрі тәрбиелік іс-шараға қатысып, алғаш рет ұлттық киім кию мүмкіндігі мен үшін өте жылы әсер қалдырды, – деді сотталған әйел.
Өз кезегінде мекеме қызметкерлері мұндай шаралардың маңыздылығын атап өтті.
– Осындай рухани әрі тәрбиелік мәні бар іс-шаралар сотталғандардың ұлттық құндылықтарға, мәдениет пен дәстүрлерге деген құрметін қалыптастырады. Сонымен қатар, олардың ішкі дүниесіне оң әсер етіп, бостандыққа шыққаннан кейінгі әлеуметтік бейімделуіне көмектеседі, – деді сотталғандармен тәрбие және психологиялық жұмыс жөніндегі жасақ бастығы Айнұр Искакова.
Ұлттық құндылықтарды дәріптеуге бағытталған бұл іс-шара қатысушыларға жарқын әсер қалдырып, қазақ халқының бай мәдениеті мен дәстүрлеріне тағы бір рет жақындауға мүмкіндік берді.
