Семейде Абай облыстық сотының төрт қабатты жаңа ғимаратының салтанатты ашылуы өтті.
2023 жылы күзде Абай еліне арнайы келген Жоғарғы Сот төрағасы Асламбек Мерғалиев болашақ нысанның орнына символикалық капсула салып, құрылыстың басталуына негіз қалаған еді.
Рәсімге Жоғарғы Соттың әкімшілік істер жөніндегі сот алқасының төрағасы Аслан Түкиев, Абай облысының әкімі Берік Уәли, Сот әкімшілігі басшысының бірінші орынбасары Шәкір Шаяхметов, судьялар, жергілікті атқарушы органдардың өкілдері, сот жүйесінің ардагерлері мен қоғам қайраткерлері қатысты. Ашылу салтанатында сөз сөйлеген Аслан Түкиев Президенттің заң үстемдігін нығайтуға және адам құқықтарын қорғауға ерекше мән беретінін атап өтті. Оның айтуынша, жаңа ғимаратта азаматтарға қолайлы жағдай жасалған, ал сот корпусы әділ сот төрелігін қамтамасыз етуге бағытталған.
Облыс әкімі Берік Уәли бұл құрылыстың сот инфрақұрылымын дамытудағы маңызды қадам екенін және Семей қаласының сәулеттік келбетімен үйлесім тапқанын баса айтты. Облыстық сот төрағасы Қайрат Чакпантаев ғимараттың қаланың қарқынды дамып келе жатқан ауданында заманауи талаптарға сай салынғанын айтты. Ол судьялардың сотқа деген сенімнің артуына өз үлестерін қосатынына сенім білдірді. Сот жүйесінің ардагері Кенжеш Мұқашовтың батасынан кейін қонақтар сот залдарын, өзіне-өзі қызмет көрсету терминалдары бар фронт-кеңсені, сондай-ақ судьялар, прокурорлар, адвокаттар және медиаторлар кабинеттерін аралап көрді. Бірінші қабатта сот кеңселері, салқындатқышы бар күту залдары, теледидарлар және ақпараттық стендтер орналасқан.
Сапар барысында Аслан Түкиев облыстың сот корпусымен де кездесіп, сот жүйесіндегі реформалардың барысын талқылады.
Жоғарғы Соттың баспасөз қызметі