Семейде 20 жастағы Дильназ Жұмағұлова аяусыз пышақтап өлтірген жас жігітке қатысты сот үкімі шықты. Бұл туралы Stan.kz ақпарат агенттігі хабарлайды.
Марқұм Дильназ Жұмағұлованың мәйіті биыл 13 шілдеде Абай облысы Бородулиха ауылындағы үйлердің маңынан табылған еді. Айыптау нұсқасына сәйкес, күдікті марқұмды 14 жерінен пышақтап, мәйітін жол бойында қалдырып, оқиға орнынан кетіп қалған.
13 қазанда Семейде осы қылмыстық іс бойынша сот үкімі жарияланды.
Істі қараған Семей қаласының мамандандырылған ауданаралық соты күдіктіні қылмыстық кодекстің “Адам өлтіру” бабы бойынша кінәлі деп таныды. Айыпталушыға 14 жылға бас бостандығынан айыру жазасы тағайындалды.
Үкім заңды күшіне енгенге дейін сотталушыны қамауда ұстау түріндегі бұлтартпау шарасы өзгеріссіз қалдырылды. Осы уақыт аралығындағы қамауда болған әр күні орташа қауіпсіздік мекемесінде жазасын өтеудің бір жарым күніне теңестіріліп есептеледі.
Сот Дильназдың ата-анасы берген азаматтық талапты ішінара қанағаттандырды. Сотталушыдан моральдық зиян үшін 20 миллион теңге, материалдық шығын ретінде 1 миллион 169 мың 600 теңге және өкілдік шығындары үшін 500 мың теңге өндіру туралы шешім қабылданды.
Бұдан бөлек, сотталушы мемлекеттік бажды, сот шығындарын және жәбірленушілерге өтемақы төлеу қорына аударылатын жарнаны төлеуге міндеттелді.
Сотталушы кінәсін ішінара мойындаған. Осыған байланысты сот оның әрекетінен шын жүректен өкіну белгілерін байқамаған.
Дильназ Жұмағұлованың ата-анасы әзірге сот үкіміне апелляциялық шағым түсіріп-түсірмейтінін нақты шешпеген.
Еске салсақ, бұған дейін Абай облысында кісі қолынан қаза тапқан Дильназ Жұмағұлованың анасы қазақстандықтарға үндеу жасап, жалғыз қызының қазасы туралы айтып берген еді.
