Қазақстанда отандық фармацевтика өндірісін ұлғайту, дәрі-дәрмек түрлерін кеңейту және импортқа тәуелділікті азайту бағытындағы жұмыстар жалғасуда. Бұл шаралар Мемлекет басшысы Қасым-Жомарт Тоқаевтың Қазақстан халқына Жолдауында берген тапсырмалары аясында жүзеге асырылып жатыр.
Соңғы үш жылда қазақстандық фармацевтикалық кәсіпорындардың өндіріс көлемі 37%-ға өсіп, 191 млрд теңгеге жетті. 2026 жылдың бірінші жартыжылдығында дәрілік заттар мен медициналық бұйымдар өндірісі 126,6 млрд теңгені құрап, өткен жылдың сәйкес кезеңімен салыстырғанда 30%-ға артты.
Қазір елімізде 200-ден астам фармацевтикалық және медициналық өнім өндіруші жұмыс істейді. Оның 43-і дәрі-дәрмек шығарады. Отандық өнімнің үлесі заттай есептегенде 40,3%-ға жетіп, қазақстандық компаниялар дәрілік заттар мен медициналық бұйымдардың 3 мыңға жуық атауын тіркеген.
Салаға халықаралық компаниялар да инвестиция салуда. AstraZeneca, Pfizer және Roche Қазақстанда өндірісті локализациялау және технологиялар трансферті жобаларына қатысып жатыр. 2025 жылы фармацевтика өнеркәсібіне салынған инвестиция 56%-ға өсіп, $142,8 млн-ға жетті.
Сонымен қатар жалпы құны 391,3 млрд теңге болатын сегіз ірі фармацевтикалық жоба жүзеге асырылуда. Нәтижесінде онкологиялық, жүрек-қан тамырлары және инфекциялық ауруларды, сондай-ақ қант диабетін емдеуге арналған препараттарды қоса алғанда, 494-тен астам дәрілік зат өндірісін жолға қою жоспарланған. Жаңа кәсіпорындар Алматы, Шымкент қалаларында, Алматы және Қарағанды облыстарында ашылып, 1,2 мыңға жуық тұрақты жұмыс орны құрылады.
Дәрі-дәрмектің халыққа қолжетімділігін арттыруға да басымдық беріліп отыр. Қазақстанда 10 мыңнан астам дәріхана ұйымы жұмыс істейді, оның 2,7 мыңға жуығы ауылдық жерлерде орналасқан. Шалғай елді мекендерде 11 жылжымалы дәріхана пункті қызмет көрсетеді.
Жоспарланған жобалар отандық дәрі-дәрмек өндірісін кеңейтіп, сыртқы жеткізілімдерге тәуелділікті төмендетуге және қажетті препараттардың халыққа қолжетімділігін арттыруға бағытталған.
