Мейрамбек Таймерденов Жоғарғы соттың судьясы қызметінен босатылды, — деп хабарлайды Tengrinews.kz тілшісі.
Сенаттың жалпы отырысында Жоғарғы Сот rеңесінің төрағасы Денис Шипп Мемлекет басшысының Таймерденовті қызметінен босату туралы ұсынысын енгізді.
«Сіздердің қарауыңызға Мемлекет басшысы Мейрамбек Таймерденовтің судья лауазымында болуының шекті жасына, яғни 65 жасқа толуына байланысты Жоғарғы Соттың судьясы қызметінен босату туралы ұсынысы енгізілді», — деді Денис Шипп.
Ол Мейрамбек Таймерденовтің сот жүйесінде 19 жылдан аса тәжірибесі бар екенін, оның төрт жылдан астамын Жоғарғы Соттың судьясы қызметін атқарғанын айтты.
«Таймерденов төрешілер қауымдастығында беделге ие. Мемлекет басшысының судья лауазымында болуының шекті жасына жетуіне байланысты Таймерденовті Жоғарғы Соттың судьясы қызметінен босату туралы ұсынысын қолдауыңызды сұраймыз», — деп толықтырды кеңес басшысы.
Сенат депутаттары судьяны қызметінен босату үшін бірауыздан дауыс берді.
