Қаржы нарығын реттеу және дамыту агенттігі төрағасының орынбасары Олжас Қизатов заңнамаға ұсынылып отырған өзгерістерді айтты. Соның арқасында қазақстандықтардың алаяқтардың кесірінен ұрынған несиелері есептен шығарылуы мүмкін, — деп хабарлайды Massaget.kz тілшісі.
Бүгін Мәжіліс депутаттары екінші оқылымда қаржы нарығын дамыту және қаржылық қызмет бойынша тұтынушылардың құқығын қорғау мәселелері бойынша заңды қабылдады.
Олжас Қизатовтың сөзінше, қолданыстағы нормада алаяқтық қарыздарды тек сот шешімі бойынша есептен шығару көзделеді, бұл көбіне зардап шеккендердің өз құқығын қорғау мүмкіндігін шектейді. Заң жобасы аясында сотқа дейін есептен шығару бойынша жаңа өзгерістер ұсынылған. Жаңа талаптардың ішінде банктен немесе микроқаржы ұйымдарынан алғашқы несиені алу кезінде клиенттің міндетті түрде өзі қатысуы, сондай-ақ, 24 сағатқа «салқындату» кезеңін енгізу бар. Яғни осы уақыт ішінде қарыз алушы алған несиесінен бас тарта алады.
«Сондай-ақ, азаматтардың кейбір санаттарына қосымша талаптар белгіленеді, яғни кредит беруге қосымша келісім алу қажет. Бұл талаптар бұзылса, банктер немесе микроқаржы ұйымдары несиелерді сотқа дейін есептен шығаруы керек. Заң жобасы аясында банктер немесе МҚҰ тарапынан биометриялық сәйкестендіру рәсімін бұзуға жол берілсе, антифрод-орталықтың талаптары сақтамалмаса, сот тәртібімен есептен шығару негіздері қосымша кеңейтіледі», — деді ол.
Агенттік өкілінің сөзінше, мұндай жайттар сотта дәлелденсе, банктер мен МҚҰ несиені есептен шығаруға міндетті болады.
«Заң жобасы аясында банктер мен микроқаржы ұйымдары үшін сотқа дейінгі есептен шығару бойынша жаңа талаптар енгізіліп жатыр», — деп түйіндеді ол.