Еңбек және халықты әлеуметтік қорғау министрі Асқарбек Ертаев Үкімет отырысында оқушылар мен студенттерді жұмыспен қамту шаралары туралы мәлімдеді, – деп хабарлайды Aikyn.kz сайты.
Министрдің айтуынша, елімізде еңбек қызметіне рұқсат етілген 14 пен 18 жас аралығындағы жасөспірімдердің саны 1,7 миллионға жетеді. Қазіргі таңда олардың 5,3 мыңы ресми түрде жұмыспен қамтылған.
Министрліктің ақпараттық жүйелерінің дерегіне сәйкес, оқушылар көбіне сауда, қоғамдық тамақтану, ойын-сауық және демалыс қызметтері салаларында еңбек етеді.
«Жасөспірімдер алғашқы еңбек тәжірибесін көбіне осы бағыттарда алады. Олар көгалдандыру жұмысшысы, курьер, даяшы, сатушы-кеңесші, аспаз көмекшісі, аниматор және басқа да қызметтерде жұмыс істейді», – деді Асқарбек Ертаев.
Сондай-ақ министр былтырдан бері enbek.kz электронды еңбек биржасында оқушыларға арналған «Менің жазғы демалысым» атты арнайы бөлімі жұмыс істейтінін атап өтті.
